我鍾意食印度的咖喱，因為食完個人㷫烚烚好鬼過癮；我鍾意馬來西亞咖喱，因為貪佢夠溫醇唔刺激，唔使飲成肚水去解辣；我鍾意日本咖喱，口味清新，香甜得來帶果香。講咁多，都只因為各國咖喱都有令我愛上佢嘅原因，今日找來三家響咗朵嘅咖喱店，你又鍾意邊一種？
記者：盧家蕙 攝影：楊錦文
Model：Ceci@TheGroup
港式風味「LEE家」生滾咖喱
「LEE家」去年開店，主打馬來西亞咖喱。李生選用了馬來西亞品牌的咖喱粉，加上多種香料：大小茴香、洋葱、蒜、芹菜、香茅等一起炒成咖喱膽，卻沒有加椰汁，李生話：「因為椰汁幾肥，唔落就可免卻滯膩感。」咖喱香濃固然重要，不過能夠吃出材料本身鮮味才考功夫。坊間不少店子都是以水兌咖喱膽，食落淡而無味。李生巧妙地熬兩大煲湯，一是海鮮湯，以大地魚及梭羅魚等海魚熬八小時而成；二是肉湯，用上牛骨、豬骨和雞熬上十多小時。再以港式生滾粥方法煮咖喱，肉類往往煮至半生熟，好鮮味。
記者試味：獨創港式生滾咖喱，肉質夠晒鮮味。菜式選擇多，連油鴨髀都有！
咖喱虎蝦$68/5隻
這次用上紅咖喱煮蝦，雖然比青咖喱辣，不過幾辣都不會蓋過虎蝦的鮮甜，大大隻幾有咬口。
葡式咖喱燒銀鱈魚$62
李生話因為𠵱家聞鱔色變，於是轉用了銀鱈魚。先把魚以咖喱膽、香草輕輕醃過，煎香了再焗，最後塗上蜜糖，魚較乾身，不過魚肉仍然好香好滑。
咖喱牛尾$52
牛尾事先醃過，令咖喱膽更易入味。牛尾好腍身，唔嚡口，似食緊燜牛腩，咖喱香味撲鼻而來，嘩，都幾辣喎！李生笑說：「因為加了辣椒油、辣椒粉和洋葱！」
咖喱桶蠔$88/4隻
李生：「啲蠔美國來㗎！」點解要用美國先？「因為佢唔會縮水，隻隻都咁肥大肉厚，而且重好有鮮味。」試吓先，又真係頂呱呱喎！
LEE家私房咖喱館
地址：九龍城侯王道33號地下
電話：27165618
營業時間：11:00am-12:00mn
註：以上咖喱可分大、中、小辣，可跟飯、豬仔包或來自重慶的薄餅。
