煲呔上個禮拜帶隊食魚，輕而易舉又贏咗唔少好評。但如果有人心水清，就會記得自由黨方剛早喺立法會一個委員會上，就建議過遲吓同周一嶽以及一眾高官做場食魚騷，等市民可以回復返食魚嘅信心。
點知轉個頭，煲呔就偷咗方剛條橋，巴巴閉閉咁帶住成班官員做騷，最衰就係佢請咗咁多人，竟然冇請呢個倡議人，反而益咗肥仔明。八方都戥方剛唔抵㗎，政府話要嚴打翻版，點可以一句唔該都冇，就攞咗人哋啲構思去用？
不過方剛就唔介意喎，話只要做咗呢場騷，有助挽回市民信心，自己俾人偷橋，甚至冇份一齊食，咁又有乜大不了？
反而做完呢場騷後，佢覺得政府真係要加強了解內地嘅官場文化，學吓同內地官員打交道，唔好以為自己嗰邊可以搞掂晒，當然最重要都係，要放低大香港心態先，唔好郁吓就上京見大老細咁唔畀面喎。
傳真︰2623-9278
電郵︰[email protected]