原來香港電台節目《城市論壇》唔經唔覺已經二十五歲，雖然近年已經愈嚟愈少高官肯畀面出席，但係就無意中捧紅咗班維園阿伯。港台噚日搞咗個二十五周年紀念典禮，請咗歷代主持人吳明林、殷巧兒、韋基舜、毛孟靜、李鑾輝、香樹輝、李錦洪、謝志峰等嚟，呢班主持人把口都絕非等閒，圍埋一齊即時就住做主持人風格問題展開激辯互片，加上政制事務局局長林瑞麟同十四個立法會議員齊齊討論香港言論空間，維園阿伯又一邊食紀念蛋糕一邊噴口水，台上台下鬧成一片。
卿姐：以前邊有人掟石
噚日唔少泛民主派議員都大吐苦水，一向惹火嘅劉慧卿話，二十年前去《城市論壇》邊使坐裝甲車走人？邊會有人掟石頭、吐口水同追打？李華明近期喺節目講豬肉、鰻魚等食品安全，都俾人鬧佢係豬係走狗。自認熱血中年嘅李卓人講最低工資，就俾維園阿伯鬧會趕走老闆，嫻姐（陳婉嫻）講佢哋就拍手叫好。班議員講講吓，重㷫過維園阿伯，慣咗同卿姐鬥嘴嘅曾鈺成都唔執輸，自爆多年前出席港台《政黨論壇》，一樣俾卿姐fans狂噓，臨走重俾人圍！
主持呢個節目超過十年嘅韋基舜就話，節目主持冇做好本份，故意迫咁啲人處於下風，冇持平地反映各方立場引致；佢老馬有火，不斷同謝志峰、吳明林、毛孟靜爭論，毛孟靜就好唔服氣咁話，主持人如果連細路仔俾人斬呢類話題都要懶持平，就真係好多餘。韋基舜冇你咁好氣，話總之各有各做法，唔關佢事。
維園阿伯：因支持先罵
至於班維園阿伯，一邊食住工作人員派嘅二十五周年紀念蛋糕，都可以一邊擘大口表達意見；有阿伯話成日鬧呢個節目係因為支持港台；又有阿伯話呢個節目最好搞足兩個鐘等大家有足夠時間暢所欲言，重有阿伯話佢哋早喺十幾年前，就喺節目度提出要搞好人口、房屋同醫療政策，𠵱家班高官不過係執佢哋口水尾喎。
傳真︰2623-9278
電郵︰[email protected]
