衞生福利及食物局局長周一嶽月前粉墨登場，拍番套電視宣傳短片，以為可以幫醫療融資報告解畫，做番齣好戲。點知成個大計畀有菌四川豬同有毒淡水魚打窒，周一嶽慘被謔稱「周一鑊」，最慘就係一鑊未完一鑊又起，變咗「周身鑊」。幾日前重要為國家質檢總局提供嘅所謂註冊魚場名單道歉，近排同佢頻頻交手嘅立法會食物安全及環境衞生事務委員會主席李華明戲言，周一嶽要去拜拜神，如果唔係，食物安全事故陸續有來，有排佢頭痕。
煲呔上場後，當時人人讚佢腳頭好，香港股市又升，樓價又起，打風都唔打嚟香港，誰不知安樂日子得三兩個月，就連派米都搞出人命，都咪話唔邪。當年九七回歸，政權交接後就爆出大大鑊禽流感，今年董落曾上，豬同魚先後出事，似乎一發生政經大事啲畜生就即刻唔多生性，○七年若然換人，唔知又有乜飛禽走獸出嚟搞搞震呢？
傳真︰2623-9278
電郵︰[email protected]