汪明荃（阿姐）和男友羅家英日前與友人乘坐郵輪歐遊，約兩周的旅程，使二人感情跨進一大步。
「感情已到頂峯」
阿姐前晚甫回港急不及待公開這次旅行的甜蜜照片，阿姐昨日在電話中說：「我第一次坐郵輪，去咗西班牙、法國、意大利、荷蘭同比利時等國家，每個唔同地方嘅古舊建築物都別具特色。」阿姐表示由於行程緊密，所以沒時間瘋狂購物，只買了一個手袋，但卻拍下不少靚相，更是此行的最大收穫。
羅家英全程充當阿姐的御用攝影師，問到這次浪漫之旅可有向阿姐求婚，他說：「冇呀，大家都玩到好攰，我哋嘅感情不嬲已經喺頂峯，冇得再高咯。」羅家英的肝癌病情暫時受到控制，他說：「好彩全程都夠休息，我過幾日都會去醫生處做吓例行檢查。」
此外，羅家英本月底會替無綫到青海拍攝旅遊特輯，他說：「我未去過嗰度，好有興趣去，呢排唔接咁多工作，想休息一吓。」
採訪：比華利
