人類生而平等呢句說話，夠晒偉大，不過只係理想啫，與「天下為公」呢句話同樣係口號。不過咁，日日嗌兩次「生而平等」、「天下為公」，做人就會虛懷啲，願意多聽別人意見，少啲以自己為地球中心。
嚡，想唔到，颶風面前，先至真係人人平等。你睇吓美國新奧爾良市全市水浸，死傷人數以千計，與南亞海嘯時布吉、亞齊造成嘅損害並無分別。以美國科技之先進，一早知道晒颶風Katrina之形成、速度、方向及涵蓋地區，竟然都冇法子做好預防工作，防止河水氾濫，堤岸崩潰，於是呢個水平線低於河水嘅城市就成為澤國，市民傾家蕩產。從電視畫面所見，新奧爾良市民之撤離（逃亡）、混亂、停電缺水、污水系統崩潰嗰鋪狼狽慘痛法，與非洲、亞齊，根本無分別。
在自然災害面前，人定勝天呢句話，係徹底廢話，人根本無法勝天，最簡單常見，每年一定發生幾十次嘅天災就係颶風，試問美國有咁多尖端科技、尖端科學家，能有甚麼辦法防禦或減少颶風嘅威力？有穿梭機上太空，三十六年前已經送人上月球，美國科學家威晒，但颶風肆瘧之時，科學家咪又係事後孔明。
Katrina為禍新奧爾良，災情慘重，對美國整體經濟無損，呢類事件會唔會喺紐約、三藩市、波士頓或者我哋上海、香港發生？左丁山係科學盲，唔識。以杞人憂天嘅思路，都怕要學狡兔有三窟，唔好將所有身家財產放在同一區域，留下最少三分一身家於流動性、部份可攜帶於身上嘅資產，例如現金、鑽石（猶太人最鍾意，逃難時用）、黃金（東方人最鍾意），銀行存款就放在三四個不同國家嘅銀行。至於家無恒產，點辦？咦，唔使驚噃，一場颶風將好多新奧爾良中產人士變為一無所有，貧富差距立即縮窄，人人平等！