噚晚睇咗一齣戲，名叫《The40Year-OldVirgin》，好名一個，一睇就知係講一個超齡處男，難忍四十嘅喜劇故事。電影海報係一個年輕中坑嘅大頭照片，𠵱起棚牙，雙眼中充滿希冀，彷彿期待着初夜的來臨。套戲好好笑，粗俗得盡情，全片充滿「F」字，「F」嚟「F」去，男主兼編劇SteveCarell在此片前名不見經傳，導演JuddApatow亦是處男下海，但影片甫上映便登上票房冠軍，爆了一個大冷門，被視為今年暑假的第一黑馬。
每年的暑假，荷李活都會產生若干黑馬，例如2001年《TheFastandtheFurious》的VinDiesel，去年《TheNotebook》的女主角RachelMcAdams，今年是黑馬，明年便是大明星。除了《The40Year-OldVirgin》外，今年暑假還有幾頭黑馬。《WeddingCrashers》由兩位笑星OwenWilson及VinceVaughn主演，內容講述兩個專去人哋婚禮識女仔嘅賤精的故事，有關方面估到呢齣戲會收，但估唔到會收得咁好，目前美國票房已接近兩億，破了當年《There'sSomethingAboutMary》的紀錄。另一齣叫做《FourBrothers》，四個唔係大明星嘅男演員，飾演四個非血緣兄弟，為養母報仇的動作片，曾連續登上票房榜首位置。幾頭黑馬為荷李活電影工業添上生力軍，若沒有這些黑馬，大家便會睇嚟睇去得嗰幾個大明星。
恭喜杜汶澤，成日聽見人話阿澤扮黑人，殊不知原來其實係黑人扮阿澤，《The40Year-OldVirgin》中的一位黑人演員，無論表情、動作、聲線都有九成似阿澤，唔信大家第日睇睇就知。