上周五美股變化不大，港股估計反覆。優質國企股見基金買意甚濃，重磅嘢國壽（2628）有睇頭。
國壽C輪9181：國壽上周一中午派半年成績表，下晝上到6.30元，未有再進。周一與周三曾兩度跌到5.95元低位，但收市價計並冇低過6元，確認6字頭守得穩。上周五尾市高收6.15元，升1格，蓄定個勢，即將有嘢睇，個別熱門C輪升12%，行定先。
國壽上半年多賺85%，高過市場賽前預測好多。有唔少好嘢跟住出台，例如摩通呈報增持近千三萬股、國壽話8月份內地證券投資唔再虧損、大行報告幾乎份份睇好。
買定啲國壽C輪守門口，冇蝕底。中度搏殺，9181啱睇。隻輪明年1月到期，輪價52仙，溢價6%，槓桿率11.8倍（有效7.4倍），引伸波幅25.8%。街貨唔多，得3%，但1日成交已有40球，有搞嘢蛛絲馬迹。
同係明年1月夠鐘嘅4702，熱門過9181，數據相差唔大，上周五升5仙（12%），9181升得2仙（4%）。
9181落後，炒國壽C輪，優先揀佢。想高度搏殺，揀3524或3967，炒呢兩隻贏同輸會比炒9181刺激。
章盛