最近兩隻大陸服裝零售股寶姿（589）及旭日集團（393），先後公布的業績都相當飲得杯落，前景更獲大行睇好。兩股PE雖達雙位數字，但仍然有一定留意價值。
寶姿上周公布截至今年6月中期業績，盈利有6660萬元人民幣，比去年同期勁升53%，中期息派7.5分。業績公布後，股價即刻上升，上周五再升5％，收7.35元，創下上市新高，成交股數170萬股，金額1250萬元。
至於旭日亦唔弱，上周公布截至今年6月中期業績，盈利有1.13億元，比去年同期上升11%，派中期息2.9仙。旭日上周五升2.25%，收3.40元，成交金額812萬元。
經紀黃話，兩隻股若作比較，佢鍾意旭日多啲，因為寶姿上市歷史較短，貨源主要集中喺幾個大基金手上，由於貨疏關係，股價容易挾上挾落，而且芬佬獲利幅度大，有沽貨獲利誘因。
旭日上市日子較長，底子又比較厚。家陣旭日主業大陸零售，除咗旗下主打牌子真維斯外，重有同I.T（999），以及Quiksilver的合營生意，而且PE較同類股為低，吸引力較大。
慕容小初