早在天后響朵的「阿郭咖喱」最近進駐太子。「太子區好似曾有間同名嘅咖喱喎。」問得好，即刻解過你知！
天后「阿郭」由三名咖喱迷經營，「郭」並非老闆們姓氏，亦非廚師名字，故事原來係太子的確曾有間著名阿郭咖喱，結業後，三名捧場客聘請了太子店廚師阿星到天后開新「阿郭」，反應好，最近又「重返」太子，走親民路線。新阿郭就以較濃稠的印式咖喱為賣點，廚師係阿星，印式巴基斯坦式咖喱都在行，但材料秘方就係秘密。負責人只願透露少少：「都係丁香、白沙仁、黑沙仁、肉桂等材料啦！全都磨碎了成為咖喱粉，再加入汁醬做成，其他的都屬獨門秘方，不便公開。」既然問不到其必殺技，咁就要用舌頭去試吓！
記者試味：印式咖喱用上極多香料，香中夾雜酸辣，味道紛陳，唔太辣。
記者：盧家蕙 攝影：楊錦文
瑪沙拉蒜茸青口$58
Masala是印度咖喱其中一種煮法，主要有茴香、豆蔻、丁香、月桂葉、紅椒粉等。青口先炒過，較乾身，入口帶點煙韌，微辣。咖喱加入了大量番茄、洋葱和五、六種香料，酸酸辣辣，幾醒胃。
白汁時菜$42
白咖喱丁點不辣，加上椰汁的香，味較淡，宜配搭較清新的配料，方能嘗到白咖喱香而不辣的味道。選用了新鮮的西蘭花和椰菜花，白汁味很濃，入口就只有香料的香，還有甜味和滑溜的口感。
PTU牛脷$50
唔係警隊嘅PTU，而是一種加了勁多番茄、洋葱的巴基斯坦煮咖喱方法，質感濃稠。負責人話：「每日用幾十斤番茄、洋葱熬製成汁，濃縮後只剩餘小量，所以成本很高。」牛脷味道帶甜，大大件依然很軟熟鬆化，正！
阿郭咖喱
地址：太子界限街47號地下
電話：27787392
營業時間：11:00am-11:00pm
