中學同學Josephine致電猛呻冇拖拍，問我有冇好介紹，之前我都介紹過幾個男仔畀佢，但又嫌三嫌四。我笑佢就快三字頭重咁奄尖，係咪想做高齡產婦？
我Eliza今年中都做咗人哋阿媽，上星期產後復工真係好唔慣，成日心掛掛個女，如果唔係老公養我唔起，我都想全職湊女啦！
Lunch之後，我又打電話問菲傭阿女情況，佢話阿女瞓緊晏覺，但唔知點解開行冷氣，阿女依然熱到成頭汗。坐喺我對面，已經做咗兩任媽咪嘅Janet聽見，佢話唔關部冷氣事，梗係個枕頭有問題，叫我最好揀個全棉或透氣乳膠枕畀BB，咁就唔會咁大汗。佢又話其實我個女得兩個月大，可以唔使用枕頭，因為BB咁細個用枕頭會好危險，如果BB翻瞓，就好易壓住個鼻令佢窒息。
聽完佢咁講好驚，五點三已經執定袋、熄電腦，諗住踏正五點半即撇湊女。點知枱頭電話突然響起，原來係老公約我食Dinner，咦！咁突然……（一）