香港迪士尼樂園即將開幕，全城哄動，地產界亦都唔例外，淨係講迪士尼開幕，點樣刺激樓市，都講咗幾個月。噚日趁公益慈善日，發展商有長實，代理界就有中記及美記，認購咗唔少入場券，做善事之餘，又可以親身試玩。
咁多間公司之中，以長實最有隊形，兩位高級營業經理劉啟文同郭子威，重有執行董事趙國雄，着晒印住東涌映灣園嘅鮮黃色T恤，重加埋頂帽。
噚日早上天氣惡劣，滂沱大雨，中記早有準備，帶齊一大批鮮紅色中原雨傘，一班員工擔住傘入場，又成功搶鏡。
另外，近排忙於搞碧堤半島開售嘅九倉置業發展董事黃光耀，都抽空與屋企人到場，又與美記高層合照留念。
電郵地址：[email protected]