泛聯盟好生猛，一時話佢哋力撐呂明華做政制事務委員會主席，一時又傳佢哋想做政府帳目委員會主席。自從去年佢哋「倒戈」支持卿姐搶咗黃宜弘財委會主席個位之後，大家就唔敢再輕視呢個手握五票嘅聯盟。
八方有日同泛聯盟成員石禮謙傾偈，佢竟然話凡政府推出嘅政改方案佢哋都支持。嘩，明撐煲呔啫！講吓講吓，佢竟然責怪八方八卦，連佢細個嘅嘢都寫埋出嚟。
事緣上兩個禮拜八方寫過篇「鳳凰台上」，話石禮謙同孫明揚細個係街坊，一齊住喺灣仔鳳凰台，個編輯重畫咗張小謙同小孫打波子嘅插畫，幅畫好得意㗎，點不知石禮謙話，自己屋企好窮，孫明揚就有錢好多，所以石家住鳳凰台嘅窮樓，孫家就住靚樓，佢哋亦冇一齊打波子咁話喎。
據八方所知，孫公媽媽係教師，在名校教中文，屋企當然唔會窮；但石禮謙亦毋須太謙，佢嘅兄弟係警界猛人，當時已經名聞鳳凰台。街坊有乜問題，就算上到差館，話識阿石Sir（Razack）就掂。至於冇一齊打波子，咁就一齊打籃球啦。
石禮謙兒時嘅鄰居猛料，現在嘅鄰居亦有名氣，例如住佢樓上嘅係鍾叮噹嘅奶奶，任志剛嘅前妻、龐傑郭秀雲夫婦亦住喺左近。
傳真︰2623-9278
電郵︰[email protected]