新世界發展（017）就快公布05年度（6月止）業績，其間趁有調整，好收集。新世界05年度中期純利11億銀，踏入下半年，集團物業發展豐收，加埋來自新創建（659）出售亞洲貨櫃碼頭近10億銀溢利入帳，全年度成績表應該好靚仔，預期PE12倍左右。
又新世界揸住本港多個投資物業，好似會展、新世界中心、新世界大廈，全部筍嘢，喺新會計制度下，好嘢冇得收埋，隱藏資產值全部浮面，家陣集團本地酒店、寫字樓及零售項目，應佔總樓面632萬平方呎，平均呎價係咁易升值一張紅衫魚，資產增值已經6.3億銀，條數襟計。
再講，新世界NAV16蚊，現價（10.15元）折讓近37%，重磅地產股當中，折讓之大，數一數二，連埋潛在資產增值因素，分分鐘唔止呢個折讓幅度。新世界往常10月中派成績表，其間再有調整，挨近短期低位9.4元，可以開始分段收集。
祥泰行炒波幅
祥泰行（199）橫行打底4個月，暫時冇乜動靜，呢隻股要長、短打，又講兩點：第一，祥泰行今年4月發行總額10億銀嘅可換股票據，承配人已經喺上個月11號完成認購，祥泰行最新市值講緊兩億銀，同10億銀碼嘅可換股票據對比，好似削咗少少。第二，祥泰行今年6月時，話同獨立第三方簽咗份不具約束力意向書，收購第三方馬交土地權50%，初步意向代價4.95億銀，呢壇製作，暫時放軟手腳，相信一有消息之時，祥泰行未必再手軟腳軟。趁消息醞釀期，喺0.38元至0.42元間炒波幅，但最好留有一手長線，大嗱嗱10億銀票據，唔信祥泰行只係如此這般。
錢雋