睇日本英文報紙—《日本時報》（TheJapanTimes），知吓日本選舉有何新聞。唔識日文，就冇得睇《讀賣新聞》、《朝日新聞》、《產經新聞》呢啲大報，睇英文報紙算係補償方法。
十幾年前，左丁山識得一位仁兄係《日本時報》嘅國際版編輯，𠵱家可能已經退休去了。日本傳媒報道一般新聞，以本國新聞為主，外國新聞唔多，日本留學生如果唔睇英文報紙，根本唔知外國發生乜嘢事。一位英國留學生在東京大學讀書，佢話日本人雖然十分進步，但並不國際化，用英文機會甚少，電視電台報紙都好本地化，在日本留學，好容易變成「鄉下佬」，不識世界大事，以佢所知，一般日本大學生嘅國際知識十分貧乏，亦無興趣，問佢哋日英關係、日中關係，能夠講得出有條理嘅，十中無一。
《日本時報》叫做係國際新聞最多，但嗰種慢十拍報道，令人啼笑皆非。左丁山拎住一張九月一日嘅報紙，頭版有marketdata一欄，講日經指數、杜瓊斯指數收市價，一睇真係啼笑皆非，九月一日星期四嘅報紙，竟然係講八月三十日星期二嘅日經指數、八月二十九日嘅杜瓊斯指數。究竟呢張報紙幾點鐘截稿㗎？每日下午五點就放工？竟然連東京日經指數嘅八月三十一日星期三嘅資料都冇？以前係咁都不可原諒，現在有咗互聯網，日本報紙重係如此工作態度，幾難唔被潮流淘汰。
英國留學生話日文報紙亦係慢幾拍嘅，星期六嘅英超聯賽果，要到星期一或者星期二先至有，根本係廢嘅。忽然間諗起，肥佬黎不如進軍日本，首先辦張日文版東京《蘋果日報》，用香港方式經營，實會在速度方面贏晒。我哋香港報紙搶新聞嘅效率，稱雄全世界，足以自豪。