躍升為新一代樂壇天后的容祖兒，才二十五歲，下月便會第四度在紅館開騷，雖然事業得意，奈何感情空白。原來鍾欣桐（阿嬌）曾主動替祖兒做紅娘，經理人又慫恿她與異性約會，只是祖兒無意出擊，靜待一位合意的成熟男士步入生命。
愛情篇：釣金龜鬧笑話
近幾年來，容祖兒除提及已分手的「隱形男友」外，她與緋聞簡直徹底斬纜，但事實上，藝人要在圈中跟緋聞絕緣確非易事，日前祖兒在灣仔接受訪問時，對能逃出娛樂圈桃花陣笑說：「我好潔身自愛㗎！唔想畀錯誤訊息人哋，費事令人誤會啦，我對呢樣嘢（愛情）幾認真，好驚啲人會有『原來你都會試吓』嗰種錯覺。」
要了解我內心
問祖兒近來有否追求者？她笑說：「其實阿嬌曾經想介紹男朋友畀我，Mani（經理人霍汶希）就猛咁叫我出街，又叫我個助手唔好咁惡，好似趕客咁，我都未聽過有經理人咁鼓勵藝人拍拖嘅。」
對於阿嬌一片好心當紅娘，祖兒竟然卻步，她說：「我好多謝阿嬌，我唔介意識多個朋友，但個心唔喺呢樣嘢度，講真，我對自己要求好高，𠵱家亦都冇乜時間去培養感情，況且阿嬌介紹畀我識嘅男仔，年紀同我差唔多，我要成熟啲㗎，所以最後我都冇出去。」
祖兒續說：「我鍾意成熟啲嘅，唔係大二十年咁多，大我十年以內啦，思想上一定要比我成熟，佢要好積極了解我內心嘅真正需要，大家可以心靈相通。我表面上係『不會哭於你面前』，我唔開心冇人知啫，呢個真命天子要唔使講，都會意識到我嘅內心。」
睇中已婚高層
談開感情問題，祖兒想起一個天大笑話，她笑說：「試過有一個場合，其中一個出席嘅高層好靚仔，佢係第二間公司嘅人，我公司啲同事猛咁叫我去啦，叫我畀心機呀、專心打扮吓，食唔食到胡靠今次，大家都嚴陣以待，但最後呢，原來人哋結咗婚。都冇了解過人哋係咪結咗婚就一味叫我加油！」
祖兒過了一會才說：「嗰個男仔，條件OK㗎，但我真係冇諗過，事後感覺好好笑，個個都好緊張我嘅幸福，公司又全部都係女仔，冇乜嘢唔講得出口，我就隨緣，係我唔急人哋急。」
愛單眼皮好仔
祖兒又大談心目中的理想對象，她說：「我唔鍾意靚仔，情人眼裏出西施，乾乾淨淨、唔好成面油淋淋已經好爽，企企理理，最緊要係單眼皮，我鍾意嘅男仔要有幽默感、上進，唔會係咪睇佢事業有成，佢一定要鍾意我，而唔係鍾意我嘅財產、事業，最緊要係佢性格好，咁佢嘅事業將來都唔會差得去邊。」
