滙豐銀行一百四十年嚟首位華人大班鄭海泉，噚日應老友羅康瑞邀請，出席「上海姑爺」客串主持嘅港台節目《一切從心開始》。經歷過人生甜酸苦辣嘅泉哥，家吓事業有成，又積極參與社會公益，絕對夠資格講「豐盛人生」呢個主題，個節目重請咗批景嶺書院嘅中學生上嚟，同佢真情對話。酷愛唱K嘅泉哥，結尾送咗首二十年前嘅《GreatestLoveofAll》勉勵班後生仔。
泉哥話當年讀緊中大新亞書院時，曾經同友儕「義辦」中學，教啲無錢讀書嘅草根階層。當時西貢區好多漁民子弟，尤其係女仔，多數都無機會讀書，所以佢哋班熱血大學生就權充老師。
一份幾十年前嘅師生情，到𠵱家重維繫住。鄭海泉話最近見番當年嘅學生，佢重反思當年自己有無誤人子弟，如果佢哋入正規學校，係咪重有前途？一個同泉哥年紀差唔多嘅女學生同佢講：「鄭sir，唔係你哋肯教，我哋連書都無得讀」，就係呢幾句，令泉哥安慰番啲，佢話：「豐盛人生，唔係你賺到幾多，間屋有幾大，係對社會付出幾多」。
唔會望女成龍
認中關社嘅鄭海泉，奉獻精神早喺火紅年代種下，「讀大學時，正值文化大革命，每個人都會深受為社會奉獻嘅思想影響，覺得咁樣先係人生要走嘅路」，再加上當代大儒唐君毅、牟宗三及徐復觀等宗師，任教新亞哲學系，包括泉哥在內嘅唔少學生都受其感召，對人生價值深刻思考。
有中學生問，泉哥自己對兩個女最大嘅影響喺邊？佢就話估計係自己對社會同朋友嘅關懷，又因為本身出生草根，兩個女都比較踏實。講開兩個讀緊大學嘅女兒，鄭海泉話，唔會望女成龍，只要求做好本份。佢話，細女雖然讀書普通，但係「考試機器」，一考試就掂，大女就鍾意藝術。不過身為大班之後，佢相信兩個女唔多唔少都有壓力。
傳真︰2623-9278
電郵︰[email protected]