外號飛天朱嘅朱幼麟（圖）同太座朱何妙馨，九月開始，告別佢哋一手創辦嘅上市公司。中化香港宣布，佢兩夫婦唔再做執行董事。中化香港嘅前身叫做華德豐，當年由飛天朱同個老友一手一腳搞起，主要做二三線寫字樓物業，喺九六年上市，但之後老友病咗，飛天朱惟有頂硬上。之不過九七年後，香港物業個市霉到點大家有眼睇，華德豐嘅表現亦一沉不起。
○三年五月，華德豐引入中化集團為股東，大家都憧憬中化會借殼華德豐在港上市，但一直都唔覺有乜動靜，上年二月，中化行使認股權，做埋華德豐大股東，重將華德豐改名做中化香港。到今年一月，中化集團先將化肥業務注入中化香港，真係等到頸都長。而飛天朱上個月至將所持中化香港股份沽出套現，直至噚日就正式同上市公司劃清界限。呢次借殼用咗兩年幾時間，分分鐘係最長嘅一次。
傳真︰2623-9278
電郵︰[email protected]