港產電腦特技造蟲《虫不知》靠青春食胡

今個星期DVD方面比較靜局，唯一新推出嘅係一套青春電影《虫不知》，主演嘅係一班英皇歌手包括Isabella梁洛施、舊Boyz、Twins等等，重有近年台灣炙手可熱嘅靚仔男演員陳柏霖，若然一班青春歌手未能吸引到你入戲院睇，呢齣戲重有一個賣點，就係用電腦特技畫嘅一班蟲蟲，比起一班靚仔靚女，一啲都唔輸蝕㗎！新返３區DVD，不妨捧場。

記者：梁瑋瑜

負責《虫不知》裏面所有電腦特技嘅萬寬電腦藝術設計有限公司，其實重負責過《千機變》同埋《頭文字D》等其他電影嘅電腦特技部人份，經驗豐富，而且喺海外亦都獲獎無數，今次《虫不知》整個製作過程用咗9個月時間，「人物」設計方面做得好好，拍得住迪士尼嘅《蟲蟲特工隊》！

■電腦特技全部本地製作，質素都好高㗎。

■一幕幕昆蟲飛嚟飛去嘅場面好有迪士尼Feel。

超能力救地球

故事主角係一班激動樂園裏面嘅後生仔女，佢哋個個都擁有唔同嘅超能力，小月（梁洛施飾）擁有同昆蟲溝通嘅能力，同甲蟲「葛吱」係非常好嘅朋友；高原（陳柏霖飾）擁有強勁「推你」能力，可以喺不知不覺間令對手跌低；小智（關智斌飾）只要用手觸摸物件就可以預知將來；鹹蛋（張致恒飾）有一對透視眼；而激動樂園嘅導師姑姑（鍾欣桐飾）係一個真實年齡為70歲，但擁有少女外表嘅人。呢班擁有超能力嘅年輕人面對地球一個浩劫，究竟點樣用各人嘅力量去化解呢？而當中幾位主角又發生咗好多感情事，最後又會點呢？答案當然留番畀大家去睇啦。

■Isabella飾演嘅小月識得同昆蟲溝通。

■高原係一個十蚊店嘅Sales，十分搞笑。

■睇唔出姑姑已經成70歲呢！

■鹹蛋有透視能力，益咗佢呢個鹹濕仔！

主角表現有驚喜

今次擔頭嘅主角係今年只有17歲嘅Isabella，記者睇完齣戲覺得佢嘅演技都算係有驚喜，無論係喊位定係感情戲都做得唔錯，而且喺電影界算係比較新鮮嘅面孔，睇落畀人一種好清新嘅感覺，加上角色係一個學生妹，搵Isabella嚟演都相當合情合理，至少唔會好似《頭文字D》咁搵杜文澤做十幾歲𡃁仔咁誇張。其他演員方面，陳柏霖係比較出色嘅一個，做一個十蚊店嘅Sales十分稱職，不過記者仍然比較懷念佢處男作《藍色大門》嘅演出，始終喺呢齣戲度未能發揮佢嘅長處，而其他演員都叫做不過不失咁，暫時未畀到記者深刻嘅印象。

■激動學園裏面個個都有超能力。

■Isabella同陳柏霖雨中相遇，好浪漫。

■一班後生仔感覺十分胡鬧。

■堂堂一個靚女成面都係垃圾，都咪話唔慘。

林海峰配音夠生動

不得不提嘅係為甲蟲仔「葛吱」配音嘅林海峰，佢嘅配音功力當然唔需要懷疑，「葛吱」呢個角色活靈活現，亦都令到成齣電影生色不少，淨係聽阿Jan配音都已經值回票價喇，而且其他昆蟲嘅表現都十分之出色，無論外形設計定係表情動作都做得好好，百分百本地製作絕對可以為香港人爭光！呢隻DVD裏面有Bonus部份，包括有製作特輯、電影歌曲MV等等，如果係一班歌手嘅Fans的話應該好值得珍藏，$70一隻DVD都係好抵買！

■螞蟻都識跳舞，好得意呀！

■「葛吱」由林海峰配音，超級生動。

■Isabella親自為製作特輯做旁白。

■重有靚到爆嘅MV睇。