陳寶珠與張學友昨日到銅鑼灣出席義賣月餅活動，吸引大批市民踴躍行善。提到日前有長者輪候平安米其間跌倒後不治，寶珠姐甚感不安，並建議改由義工上門派發，令長者免受排隊之苦。
陳寶珠與學友昨日出席「志蓮淨苑教育基金」義賣月餅活動，為買了月餅的市民簽名。寶珠姐更帶同兒子楊天經同來，其影迷亦相當守秩序，還不時送上禮物給寶珠姐。
影迷紛紛送禮
前日在尖沙嘴有數千長者排隊輪候平安米，其間一位老婆婆不幸跌死，寶珠姐表示：「我今日睇報紙知道有個阿婆跌死，個心好唔舒服，我覺得有關方面應該安排好啲，例如搵義工將平安米送去公公婆婆屋企。」
至於學友昨日從鄭州返港，便趕到現場義賣，即場捐出五百元做善事。身為香港迪士尼宣傳大使的他，對於吳彥祖及許慧欣等藝人先後批評迪士尼的工作人員態度欠佳一事，學友說：「我諗係個別情況，我去過又冇乜嘢，我啲朋友去完亦冇投訴，可能拍嘢又唔同啦！而且工作人員又唔係香港人，喺美國迪士尼過嚟，大家唔清楚運作。」
月餅贈閔大人
學友日前與「閔大人」池珍熙為電影《如果．愛》錄歌，學友還即場指導，他說：「電影公司覺得可以再錄好啲，叫我幫手教佢點唱。佢嘅歌喉唔錯，幾勤力，一早將中文字譯成韓文發音，不過有啲發音寫唔到，咁我就唱一次，佢跟住我唱，之後我重送咗盒月餅畀佢。」
採訪：魯萍
攝影：陳偉權
