電訊商和記環球電訊公司六名上網網絡用戶投訴，因網絡經常故障，預約電訊公司維修工人上門維修，但職員屢次失約，其中一客戶更指維修工人失約八次，令他次次在家白等，投訴無門，惟有向《蘋果》求助，經本報跟進後，電訊公司即派人修妥網絡。
一個月先後被失約八次的和記環球電訊上網網絡用戶曾先生，居於大埔私人屋苑大埔廣場一單位，他向本報投訴稱，使用和記環球電訊固網電話及上網服務已逾半年，今年七月底開始，上網網絡經常故障，令他不能查閱電郵及瀏覽網頁，已令他極為不便，和記環球的維修安排，令他更氣結。
「次次應承，到時無影無蹤」
「個網絡一有唔妥，我就打電話去和記環球電訊，要求佢哋派人嚟維修，佢哋每次都即刻畀到個時間我，我就留喺屋企等佢哋嚟；但係每一次等到過晒時，都唔見人影，之後我打電話去追問，佢先至同我講安排唔到；本來一次兩次係咁都算數，點知竟然連續八次都『甩底』，啲嘢混亂成咁，又次次都冇合理解釋，嘥晒我啲時間，呢個幾月又上唔到網，真係忍無可忍！」
居於將軍澳居屋康盛花園的區小姐稱，她被和記環球電訊維修工人爽約三次，「八月初安裝上網網絡後，根本上唔到網，打電話搵佢哋維修，次次都應承，不過到時就無影無蹤，嚟唔到事前又冇任何通知，搞到我次次白等，好唔負責任。」
另外四名和記環球電訊上網客戶：居於東涌私人屋苑映灣園的朱先生、鑽石山居屋宏景花園的劉先生、青衣公屋長亨邨的陳小姐，以及沙田公屋禾輋邨的梁小姐。他們四人都分別因網絡故障後，要求電訊公司派人維修，職員雖即時安排維修工人、約定時間上門維修，但到約定時間卻不見人影，令他們無法上網，投訴無門，只好向《蘋果》求助。
經《蘋果》跟進上網回復正常
本報將投訴轉介和記環球電訊處理，和記環球電訊只簡單回覆本報查詢稱，正跟進曾先生及區小姐的投訴；至於朱先生、劉先生、陳小姐及梁小姐之投訴，和記環球電訊已向他們解釋有關情況，並已完成跟進工作。
記者其後聯絡投訴人跟進投訴，其中朱先生、劉先生、陳小姐及梁小姐均表示，經《蘋果》跟進後，上網服務終回復正常。
（○七○八○八五）（○七一三一二○）（○八一○○○一）（○八一七○三二）（○八三一○二二）（○八三一○二三）
服務熱線
電話：29908288
傳真：23702192
電郵：[email protected]