領匯全線起動，因為官司了結，上市有望，唔怪得孫明揚噚晚出席公屋聯會二十周年晚宴話，佢手下唔少人已全速進行籌備工作，相信年底前會再安排領匯上市。
八方聽聞佢哋嘅申請下個月就會提交，有財政司司長領導兩個局長一齊督導，睇怕一定冇人會（敢）阻撓，申請不過例行手續而已，證監同交易所都想玉成其事嘅。
至於領匯班夥計，八方知道佢哋都好想快啲上市，以便獨立於房委會個官僚架構之外。其實佢哋接管咗啲商場停車場之後，都好搏殺，好似早前就搞過購物大抽獎。今個禮拜日會喺慈雲山中心搞嘉年華兼抽獎，搵咗原子鏸嚟唱歌，高鈞賢（香港先生）嚟玩X-Box。
另外今日下晝佢哋又會喺樂富中心搞慶中秋慈善活動，整個全港最大嘅七星伴月月餅嚟敬老，總之就要搞旺個場、搞起個勢，咁第日上市時，都多啲嘢同班芬佬講呢。
爆料熱線：29290000、27860099
報料傳真：26239278
報料電郵：[email protected]