韓風持續，阿Rain聽日來港宣傳佢代言嘅護膚品，香港呢邊就有財政司司長唐英年，下禮拜二飛去南韓濟州島，出席第十二屆亞太經濟合作組織財長會議，星期五至返香港。今年會議主題係「自由及穩定的資金流動」同埋「人口老化為經濟帶來的挑戰」，唐唐會就全球同地區性嘅經濟發展同其他地區交換意見。
與此同時，太平洋經濟合作議會第十六屆全體大會就喺星期一至三，喺南韓首爾舉行，探討太平洋地區一體化呢個構思同宏願。香港委員會由嶺南大學校長陳坤耀帶隊，率領一行十七人嘅香港代表團參加。代表團成員亦包括太平洋區域經濟合作青年研習計劃嘅勝出隊伍，該計劃由太平洋經合香港委員會同香港青年協會喺較早前合辦，主要為咗提高年輕人對區域合作嘅認識，培養佢哋分析能力同創意思維。
爆料熱線：29290000、27860099
報料傳真：26239278
報料電郵：[email protected]