先排提過大陸地產股有異動之象，與此同時又有唔少細價股炒作。經紀陳話，有隻股份具備以上兩個條件，就係年前轉換大股東後，轉型做大陸地產的中新集團（563）。
隻股近排成交急增，傳聞公司將向大股東收購大陸物業項目。由於買嘢要使錢，所以唔排除會順便批股抽水，但究竟以乜嘢價批股，聽講至今仍未講掂數，有人想等個價好啲至批股，至於等唔等得咁耐就好難講。
中新喺7月份公布截至4月底嘅全年業績，盈利有1.8億元，比去年勁升17.5倍，末期息派2.2仙。雖然隻股業績見得人，但都係近排先見有異動，昨日又升1.6％，收0.63元，成交股數1966萬股，金額1246萬元。
另外，呢排濠江賭股消息一浪接一浪，噚日奧瑪仕（959）停牌，據講係增持希臘神話賭場權益，聽聞所牽涉銀碼好大，公司又要發新股，又要畀現金支付，睇落都好複雜，有知情人士叫捧場客畀心機等，唔會咁快搞掂。
慕容小初