十幾個喺網上討論區認識的主人，同十幾隻素未謀面嘅狗仔一齊開P，你話邊個最開心？重使問，梗係呢班狗仔最開心啦！有得食、有得玩，重有份參加FashionShow㖭喎！即管睇吓邊隻係眾望所歸的「潮爆松松」啦！
記者：杜慧妍
攝影：楊錦文
鳴謝：myQpet.com
It'sshowtime...
松松特工隊初聚會
「松松特工隊」係myQpet.com裏面一個關於松鼠狗嘅討論區。第一次做版主的阿Pat話自己從未搞過狗仔聚會，所以開版差唔多兩年，今次都係第一次同會員見見面。「今次好多謝大家支持，希望透過聚會大家可以認識多啲，交流多啲養狗心得。」
慌失失樂園
唔知係咪怕生暴，一班松松特工一到埗就個個慌失失，唔敢同其他狗仔玩。係得Kitty比較啖定啲，原來佢媽媽Jacqueline經常帶佢出賽：「Kitty同佢細佬Bobby都係冠軍ShowDog嚟㗎，見慣大場面！」
醫肚時間
參選狗仔逐一登場之後，係時候醫醫肚，兼畀啲時間大家投票。主人們可謂食唔安坐唔落，皆因自己食得嚟又要餵班為食松松。班松松見到佢哋主人食得咁高興，即刻使出嗲功要主人畀零食，重會出招表演絕技㖭，認真醒目！
為食Show
興奮的時刻嚟喇……
經過一輪花生騷之後，投票亦有咗結果，第一屆「潮爆松松」誕生啦！得到最多票數嘅松松係：憑住一身HarleyLook大熱勝出嘅Kitty！細佬Bobby都唔輸蝕，拍住上攞咗個季軍，果然無失威！而着住喱士裙又曉跳舞嘅BB就得到亞軍。
後記
冠軍星媽Jacqueline本身係香港寵物福利協會委員，佢以前有份幫手爭取公屋飼養寵物，有好多年搞寵物聚會嘅經驗。今次佢係應邀嚟做搞手：「𠵱家網上有好多類似『松松特工隊』嘅Forum，只係無人去搞活動。今次佢哋係想凝聚一班愛狗之人，等大家喺Forum可以Active啲多啲留言，亦可以畀多啲Support其他狗主。」