恒指再升78點，但10大升幅輪有4隻係滙價輪。
歐美C輪3989：近日歐元兌美元由1.233升上1.2563，3989由1.6仙彈上2.3仙，單日升44%，有23球易手（48萬元貨仔）。揸咗嘅1日賺4成半，發達咯！且慢，8月12日左右，歐元兌美元係1.2434，到𠵱家算係升咗，但當日3989係3.6仙，到𠵱家仍然慘跌36%。3989喺11月中夠鐘，溢價超過12%，你買埋我份。
歐美P輪3993：歐元兌美元升，歐元兌美元P輪當然PK，3993由34.5仙散落25.5仙，冇咗26%，上咗死火輪榜，有2.7球易手（74萬元）。上便嗰段講過，由8月12日到𠵱家，歐美C輪3899跌36%，但嗰日到𠵱家，3993亦跌21%。呢段時間，睇歐元兌美元升買C輪，輸錢；睇歐元兌美元跌買P輪，又輸錢，炒家真係淒涼個淒。3993喺11月中夠鐘，溢價2%以下，比較合理。
齊做輸家大輸小輸：3989與3993係「一對輪」，發行商通常都係C輪與P輪同一齊發，畀看好者與看淡者一齊有機會「玩」。
假設呢對輪喺3月發行時，睇好歐元兌美元者掟1千萬銀買3989，今日輸剩89萬元。睇淡歐元兌美元者又掟1千萬銀落去買3993，今日仍值980萬元，都係要輸。兩邊都要輸，道理同喺葡京賭錢一樣，賭錢輸抽水，炒輪輸溢價。窩輪市場睇嚟都唔使點加強監管，因為啲炒家已經輸剩1/2或1/4條人命，冇錢賭。
章盛