曾志偉前晚為曾與他傳緋聞的新人林苑舉行新歌試聽會，他整晚狂踩林苑，除指她又矮又唔靚外，又謂她的唱歌水準差，志偉還以「會被嘲整容」為由拒幫林苑戴上后冠，順便暗寸出爐港姐冠軍葉翠翠。
曾志偉旗下新人歌手林苑簽約正東唱片後，前晚在尖沙嘴一酒吧舉行新歌試聽會，廣邀傳媒、各電台及電視台高層到場欣賞，半百人塞滿酒吧。
緊張口乾頻喝水
林苑即席獻唱六首新歌，雖然表現緊張，不時口乾要喝水，但水準不俗，博得滿堂掌聲，不過向來口臭的志偉，並未因此讚賞林苑，反而整晚挖苦她，他表示此舉只為鞭策新人。
林苑在台上說：「志偉像我爸爸，教我很多東西，不過他都不對我說好話，常挑我缺點。」志偉則說：「我同公司傾過，佢嘅水準最多賣千幾張。」問他有否鼓勵說話，志偉謂：「我最叻喺垃圾堆中搵啲唔係垃圾，我一次喺大陸拍劇唱Ｋ聽到佢唱歌，呢個（林苑）又矮又唔靚又唔夠醜，再醜啲就話可以整容，但勝在唱得吓，八字又夾正東，所以簽正東。」
後來唱片公司安排志偉送后冠及權杖給林苑，誰知志偉竟拒絕並暗寸出爐港姐葉翠翠，他說：「搞埋啲咁嘢，又唔早啲講，戴咗俾人話整容㗎。」志偉要林苑自己戴上，他又謂：「我送嘢就會送鹹鴨蛋，樂壇唔易做，唔得就返去賣鹹鴨蛋。」
鼓勵說話嫌太多
事後林苑接受訪問時說：「愈親的人愈不會說好話，跟父母一樣。」志偉則說：「太多人同新人講鼓勵說話，我覺得唔應該太多好說話。」林苑會做好成績當給志偉禮物，賺到錢也會送限量版汽車給他。
志偉曾與林苑傳緋聞，志偉說：「我份人好鍾意幫人，咪俾人寫囉，得啖笑，都慣咗。」
採訪：馬建華
攝影：何國豪
