星爺周星馳唔單止電影事業成功，早排投資地產亦大有斬獲。不過星爺未因為咁而滿足，最近佢重想喺創業板大展拳腳，做埋上市公司主席㖭！佢打算將旗下公司「品記國際」搞上市，初步集資五千萬。
不過一間公司搞上市，通常有好多條文規定，若然間公司唔符合規定嘅話，申請分分鐘會被彈返轉頭。馮仁昭聽聞星爺間「品記國際」上市申請，喺前日港交所上市委員會聆訊中未獲得通過，或多或少會搞亂咗星爺上市嘅計劃。
○○年成立
講番星爺想上市嘅「品記國際」，間公司喺○○年成立，主要業務係喺內地提供廣告同電視製作，同時亦係一間經理人公司，旗下藝人包括有田雞田啟文、肥仔聰林子聰、黃聖依同元秋等等。連田雞同肥仔聰都當係上市公司資產，星爺你係得嘅！