北京呢下子認真旺場，煲呔噚日下晝抵達京城，準備出席今、明兩日，紀念抗戰勝利六十周年嘅活動，而保安局局長李少光又咁啱在京訪問。至於梁愛詩同李國能，就分別帶領律政司代表團同啲法官今日啟程赴京，出席第二十二屆世界法律大會。
傑哥要趕返香港打官司
講開呢個大會都算巴閉，香港有成五十幾位法律界人士參加，當然唔少得45條關注組嘅四大狀。由功能組別產生嘅吳靄儀重係攞住個英國護照，所以要簽證，而余若薇、湯家驊同梁家傑三個全部循直選產生，早就冇晒外國護照要用回鄉卡。
八方問梁家傑此行有冇機會見吓京官講政改，佢話睇個樣就冇，因為佢哋幾個都好忙，要趕返香港打官司，所以較早前有傳聞話曾慶紅副主席嘅中學同學兼親信朱育誠所長想見佢哋，睇怕好難成事咯，當然喬曉陽屬同行，可能會喺大會見到。
原來四大狀訂晒機票周一晚返港，而港澳研究所所長朱育誠就想喺周二宴請佢哋，咁時間唔啱，冇計喎，凡事都好認真嘅Alan（梁家傑英文名）話：「其實我冇收過任何邀請，不過我六號要上上訴庭，冇得改期。」
咁又係，朱育誠如果想同佢老死放風收風，早前喺珠海擺陣可以請埋四大狀去，今次上京行程緊密，真係好難相就，當然有心都會安排到嘅。八方聽聞梁愛詩星期日晚會喺北京宴請香港團，到時咪請埋朱育誠一齊食飯，傾足一晚都得啦，反正好似梁家傑話齋，佢哋嘅意見報紙都登晒，冇乜嘢好講。
咁又唔係嘅，朱所長可能有啲心底話要講呢。梁家傑就好硬淨咁重複佢哋嘅立場，就係「我哋有足夠理由繼續支持○七及○八年雙普選」，中央唔還價，佢哋冇理由不斷自己降低要求。
而如果真係有機會見到最高負責人如曾副主席，梁大狀肯定會同佢曉以大義，說服佢民主係件好事，𠵱家民情可能唔係有好大反響，但係啞忍唔等於心悅誠服，真心擁戴。
「葉公好龍」諷刺白鴿黨
嗱！梁家傑呢啲就叫做擇善固執啦，白鴿黨真係要學吓，要「見大人而邈之」。其實噚日長毛贈佢哋兩句都係呢個意思，所謂「葉公好龍」，故事係恥笑一個愛龍如命、家裏全用龍嚟雕飾、姓葉名子高嘅古人，當條真龍到訪，竟然嚇到面無人色，以諷刺啲講一套、做一套嘅人。至於「銘記子霖」，就梗係指天安門母親丁子霖啦。
爆料熱線：29290000、27860099
報料傳真：26239278
報料電郵：[email protected]