學校噚日開課，但係行會同立會重放緊暑假未正式復會，八方聽聞行政會議呢個月十三號就復會，而立法會就喺下個月十二號先至開鑼。
既然未開工，長毛梁國雄樂得喺歐遊蕩吓，睇吓風景，見吓朋友，點知到咗第一站德國柏林，就發現唔知幾時唔見咗個護照，最慘係連個身份證都一齊冇埋，認真大鑊，差啲喺柏林機場落難。
好彩喺歐盟國家飛嚟飛去，有機票就掂，所以佢最後都成功登機去咗維也納。長毛噚日喺維也納一間小酒店內同八方講，佢星期一，即係八月二十九日已經攞番個新嘅特區護照，由報失到復得，前後唔夠一個星期，認真有效率，所以佢特別拜託八方，喺度為佢多謝中國駐奧地利領事館、特區政府人民入境事務處同埋立法會秘書處。
原來長毛當日都唔知自己係跌咗抑或俾人撻咗個護照，裏面重有張身份證夾住，好彩個銀包冇失，佢話自己成日出外，都好少可會唔見證件咁甩鬚，所以惟有硬住頭皮打長途電話返香港立法會秘書處求救。秘書處一收到長毛電話，一定第一時間通知特區政府以及人民入境事務處，八方估，李少光知道呢個消息，真係唔知好嬲定好笑，因為長毛平日只會鞭策佢哋，好少尋求幫助。
入境處出名快手同幫得手，加上長毛話晒係尊貴議員，當然不敢怠慢，長毛喺海外遺失證件，幾唔願意都要去當地嘅中國領事館辦理補領手續。為咗證明身份，佢重攞埋隨身帶住嘅小冊子，裏面有佢喺立法會發表嘅言論，畀中國嘅官員睇，唔知當中有冇要求平反六四嘅發言。
其實長毛個file喺中國政府已經相當厚，唔使多介紹，怕且係人都識佢，簡直係化咗灰就認得嗰種。點都好，不但只冇人麻煩佢，重好快搞點，護照攞番，但係身份證仍然未有，應該都可以返到香港入到境啩。
贈言：莫做葉公銘記子霖
八方問長毛幾時回港，佢話本來訂咗機票四圍去，𠵱家就亂晒行程，下一站想去法國探朋友。當然佢一定會喺曾慶紅副主席訪港期間趕返嚟，因為已準備好要去迪士尼示威抗議以及爭取同國家領導見面。
長毛預先張揚要搞嘢，唔知會唔會影響佢回程，不過佢一向冇有怕，咁先似longhair。長毛話咗會跟煲呔去珠三角，對於民主黨話唔會提六四，長毛就鬧鬼白鴿黨唔應該自我檢查，重話好支持華叔要抦吓白鴿黨，臨收線，佢贈白鴿黨兩句，「莫做葉公、銘記子霖」，重話共產黨放民主派返去唔係鍾意佢哋，而係需要佢哋喎。
傳真︰2623-9278
電郵︰[email protected]