鄭中基新歌《無賴》唱至街知巷聞，估不到連亞視也想趁熱鬧，竟擅自採用該曲作為新劇《小魚兒與花無缺》的宣傳片歌曲，鄭中基與所屬金牌唱片感不滿，要求亞視馬上停用。
鄭中基（Ronald）的大熱歌曲《無賴》除成為各大電台及卡拉OK榜的冠軍歌，更有望成為年底各頒獎典禮「金曲金獎」的大熱歌曲外，坊間亦有不少卡拉OK店自製卡拉OK版供客人點唱，想不到近日亞視播出由張衞健及謝霆鋒主演的新劇《小魚兒與花無缺》宣傳片段時，也以《無賴》一曲作襯底。
屢用歌曲做宣傳
據知亞視未得Ronald所屬金牌唱片同意，擅自使用該曲作劇集宣傳，Ronald及金牌都大感不滿，加上Ronald向來與無綫關係良好，為免無綫誤會，故已着唱片公司向亞視要求停用該曲。原來亞視此舉已有前科，在○三年該台播放韓劇《玻璃鞋》時亦嘗擅用Ronald的《我代你哭》作為宣傳片背景音樂。
Ronald昨日在電話中說：「大家都咁鍾意首歌，我當然開心，但係保護知識產權都好重要，就算首歌幾受歡迎，我都唔想喺我或者公司不知情下，俾人用嚟作商業用途，而且對方唔止一次咁做，我覺得好似俾人偷嘢咁。」
金牌唱片陳小姐昨日在電話中表示：「我哋知道後都好愕然，𠵱家正同律師了解緊個情況，無論如何，佢哋未得我哋同意下用咗首歌，我哋覺得不被尊重，我哋係可能情況下會採取進一步行動。」
亞視稱冇得追究
亞視副總裁楊紹鴻昨日接受查詢時說：「我問過有關部門，佢首歌已經出咗碟，無論歌手同邊度有合約，我哋都可以喺九十日內播放，對方冇得追究，只可以話我哋唔尊重唱片公司，我哋係冇知會佢哋囉。」楊紹鴻又謂除了Ronald外，亞視亦有採用其他歌手如MichaelJackson的歌曲。
採訪：蔡如玉
