李彩華（阿Rain）同楊愛瑾（Miki）日前喺銅鑼灣出席日本化妝品牌Canmake嘅宣傳活動，馮仁昭八到廣告商打算揀其中一個做代言人，不過就要睇阿Rain同Miki邊個受歡迎啲先決定。
棄將復仇記？
阿Rain係黃柏高間金牌經理人公司嘅棄將，當年佢解約後，黃柏高轉個頭就捧Cookies，結果重紅埋，阿Rain同Miki唔妥早有前科。聽講有人向廣告商暗示「有佢冇我」，希望廣告商只安排一個女藝人出席活動，所以當日阿Rain同Miki同場時表面上冇乜嘢，但着露背裝嘅阿Rain就大講有味笑話同用唇筆篤赤裸男模嘅乳頭，Miki見到俾人搶晒鏡，乜癮都冇晒。
馮仁昭問番Miki同阿Rain唔妥嘅傳聞，Miki經理人公司嘅陳小姐話：「佢哋冇不和，大家都唔熟，都想做好個job。如果佢哋唔啱，公司就唔幫Miki接呢個工作。」而阿Rain嘅答案啱啱相反，佢話：「我聽過呢個傳聞，我同佢只係hibyefriend，不過我相信一樣嘢係要公平競爭，最緊要廣告商搵個啱佢嘅代言人，我只係做好本份。」