一代扮嘢宗師盧海鵬，日前與呂珊、胡美儀等歌手舉行新碟簽唱會時，竟然一出場便「趕客」，叫觀眾離場，還面黑黑拒絕與fans影合照，可是觀眾不但沒半點生氣，反而全場拍手大笑，唱片公司即計劃為鵬哥舉行個人扮嘢搞笑騷，實行與眾同樂。
盧海鵬近日除了忙於為無綫拍劇外，還出唱片兼頻頻登台做騷，忙得不可開交。日前，鵬哥便聯同大AL張武孝、呂珊及蘇珊等，到九龍灣德福廣場舉行「粵調金曲星聲陣」簽唱會，吸引數百fans到場。
愈寸愈開心
鵬哥是實力派藝人，多年來均有一班擁躉支持。當他站在台邊準備出場之際，現場fans已即時起哄，然而鵬哥似是充耳不聞，還一上台便「趕客」說：「嘈乜嘢！個節目做完㗎喇，走啦！你哋去飲茶啦！」結果現場觀眾全都拍手大笑。待進行簽名活動時，fans們頻頻要求跟鵬哥合照，鵬哥卻老實不客氣說：「我今日嚟簽名，冇預影相喎！」又問：「究竟你簽名定影相㗎！」然而鵬哥表現愈cool，fans便笑得愈開心！
唱粵曲助興
原本當日大會只安排呂珊，大AL及蘇珊獻唱，鵬哥則跟fans玩遊戲和簽名，但因為現場觀眾反應熱烈，更多番起哄，鵬哥遂清唱一曲《卧薪嘗膽》。據有份主辦當日簽唱會的環星唱片發言人蔡先生表示，有見於觀眾對鵬哥反應如此熱烈，正計劃為鵬哥舉行個人搞笑騷，讓鵬哥在舞台上再施展當年的扮嘢絕技！
採訪：戴彩煥