早排市場盛傳多隻濠賭股在第4季有唔少動作，所以唔少人都估佢哋點都會炒番轉，睇番近期發展，則屬個別發展，視乎有無消息配合。
經紀陳就話，近期走勢甚勁的嘉華國際（173）同埋嘉華建材（027），市場盛傳嘉國即將向股東分派嘉建股份，所以兩隻股均一齊炒起。
嘉建昨日最高見6.10元，收6元，升5.3％，成交股數有成3367.4萬股，金額1.98億元。至於嘉國亦不俗，升4.6％，收2.875元，成交股數4576萬股，金額1.29億元。單睇兩股咁大成交，似乎都好多人信呢個古仔。
若傳聞係真嘅話，應該揸嘉國着數過揸嘉建，不過世事好難講，因為嘉華孖寶次次炒親，都係阿仔嘅爆炸力勁過阿媽。
另外又係濠賭股消息，英皇娛樂酒店（296）在濠江間酒店即將開幕，隻股炒咗一輪後有獲利回吐，但阿媽英皇國際（163）就愈戰愈勇，昨日又升6％，收1.92元，創出52周高位。
慕容小初