馬會噚日傍晚喺山光道會所舉行會員周年大會，投票選出一位新董事，以填補政務司司長肥龍許仕仁辭職留低嘅空缺，結果同八方喺個半月前收到嘅料一樣，由永安國際副主席郭志桁太平紳士當選。今次八方收到嘅料真係堅，如果呢個禮拜日馬季開鑼都收到呢啲咁正嘅消息，到時贏個盤滿缽滿就最好不過。
郭志桁喺一九八九年成為馬會遴選委員，一做就做咗十六年，而佢亦係資深馬主，名下馬以「旺財」命名，現時養有「真旺財」，佢父親郭琳珊當年亦曾出任過馬會董事。
此外，三位董事陳祖澤、施文信同葉錫安都獲選連任，任期為三年，而夏佳理同陳祖澤分別連任主席同副主席。
講開夏佳理，自上年周年大會開始，佢就不斷強調要以稅制改革挽救賽馬投注額，至幾個月前特區政府終於接納馬會建議，計劃喺九月立法會重開時提交修訂法案。喺呢個關鍵時刻，夏主席當然又喺周年大會再重申馬會立場，至於能否成事，據消息指今年年底至明年一月就會有結果。
傳真︰2623-9278
電郵︰[email protected]