Kary近期忙於為周日（四日）舉行的音樂會綵排，為求令演出更精采，Kary已邀四猛男助陣，與她在音樂會中上演一場勁歌熱舞，但她仍十分緊張，更經常夢見被追殺。
吳雨霏（前名吳家穎，Kary）將於下周日在九龍灣國際展貿中心演出商台「加州紅903熱火樂團音樂會」，由於今次是她獨立演出的處女騷，故當她得悉二千張門券早已派清，有人更在網上將入場券炒至七百元一張，才令她稍微鬆一口氣。
負傷排練
為報答fans支持，Kary連日來每天排舞至少九個小時，只為當晚表演十五分鐘的勁歌熱舞環節。
日前Kary在九龍城一間排舞室與四名男舞蹈員練舞，雖然連場熱舞極具視聽之娛，實際上她卻是冒着腳踝舊患排練。
Kary說：「近排我每朝都係十點幾就開始排舞，一排就排到天黑，但之前做森美小儀歌劇團時扭傷咗右腳踝，我又唔敢睇跌打喎，好驚人哋唔知點樣屈我隻腳，好彩𠵱家都OK，係排完舞就會有少少痛。不過演出嗰晚，我要着三吋高跟鞋跳舞，到時就真係小心啲啦。」
側田助興
Kary續說：「今次個騷有一part係成十五分鐘嘅勁歌熱舞，我要求搵四個猛男dancer嚟陪我。呢排我個人都好緊張，成日驚唱個半鐘唔夠氣，要不停練氣，我重晚晚發夢被人追殺。」
Kary表示除邀得同公司的側田助陣外，亦請了一名神秘男歌手擔任嘉賓。
採訪：朱倬誼
攝影：何榮亮
