喺電影《黃飛鴻鐵雞鬥蜈蚣》中飾演大反派、布下蜈蚣陣同李連杰激戰連場嘅動作演員徐忠信，雖然有番咁上下年紀，但仍火氣十足。前日凌晨佢同擅演警務人員嘅無綫男藝員李子奇一齊喺灣仔CC@lounch酒吧門外出現，其間徐忠信疑因飲大兩杯同人發生拗撬，好心做和事佬嘅李子奇反而硬食徐忠信兩記「鐵沙掌」。
前日凌晨約兩點，李子奇同徐忠信喺酒吧門外拉拉扯扯，當時李子奇以雙手緊箍對方，又用身軀阻擋對方前進，徐忠信不斷反抗，猛力甩開李子奇之餘，重一邊爆粗、一邊企圖衝入酒吧，而李子奇依然竭力制止，搭着對方膊頭勸他息事寧人。
最後握手言和
不過火遮眼嘅徐忠信不單唔領情，重兩度用「鐵沙掌」大力推開李子奇，呢吓李子奇真係佛都有火，忍唔住向對方大叫：「走啦，唔通我害你咩？」臉上青筋暴現嘅徐忠信再用力甩開對方，重大聲叫：「我×佢老母，你唔好理我啦。」講完即時衝入酒吧，冇耐就出返嚟，跟住有兩名彪形大漢先後步出酒吧，重主動同佢握手言歡同道歉，呢個時候徐忠信終於降火，喺李子奇又拖又拉下離場。
