領匯官司完結後，政府正全速籌備領匯重新上市。𠵱家香港重未有好似領匯呢種房地產投資信託基金（REITs），但其實李超人旗下嘅長實舊年已經推出「置富產業信託基金」，不過係喺香港嘅對手新加坡掛牌，聽講話因為當地對REITs上市嘅條件較吸引，所以超人先棄港投星。
不過香港呢邊，證監會亦唔執輸，舊年已經成立REITs委員會，諗吓點樣促進呢種新產品，寧願放寬多少，都好過食白果，俾坡佬笑。
噚日證監公布，委任三名新人加入委員會，其中包括李超人旗下和黃嘅副董事總經理周胡慕芳，咁樣睇，置富基金回歸香港上市都有可能。另外滙豐銀行主席顧問韋智理亦獲委為新委員，睇嚟呢個委員會嘅人馬來頭都唔小。
傳真︰2623-9278
電郵︰[email protected]