數碼影音:30mm手動重炮隔個海影金紫荊升旗

數碼影音:30mm手動重炮隔個海影金紫荊升旗

近排相機界流行又細又潮薄身DC,似乎忽略咗大機都有唔少玩家追求,趁住呢個空檔時間,富士將今年重量級新機FinePixS9500推出巿場,重點功能當然包括富士王牌SuperCCDHR感光片,配合一支大炮式10.7倍變焦鏡頭,絕對係近期最有份量嘅Prosumer級相機,拎住S9500就算由尖沙嘴影過金紫荊廣場拍升旗禮都無有怕,拍出嚟嘅相重好清好靚㖭。

記者:許福合
攝影:伍慶泉
ImageGirl:Kennis

10.7×變焦電子EVF

好多人見到S9500真身,都以為係一部D-SLR,事關從鏡頭到機身,都做得相當有台型,尤其支重炮鏡頭,可提供10.7倍光學變焦,筆者試過由尖沙嘴海旁影過灣仔會展金紫荊廣場,效果相當唔錯,若果再開埋2倍數碼變焦,效果就好似去到現場一樣,不過數碼變焦功能比較「特別」,無得作微調,開啟後只會以固定比例放大,對一般數碼相機嚟講,呢個設計會令操作變得困難,不過S9500採用ZoomRing設計,變焦同對焦都學足單鏡相機一樣操作,令用家要作細微嘅調節都可以好有把握。S9500同好多高倍數DC一樣,都係使用電子式EVF,唔用芒睇EVF都叫清楚,解像度足夠,可顯示齊全拍攝資料,至於機背嘅LCD,大小只有1.8吋,感覺略細,但勝在畫質夠細緻,而且LCD重可以作「Z」形上下翻開,用嚟影高、低角度都好方便。

■LCD可以拉出並揭起90度。

■用埋ZoomRing設計,用作細微調校都好方便。

■按下EVF/LCD,就可從兩者間轉換畫面。

900萬像素SuperCCDHR

S9500除咗影得夠遠,原來亦係支Wide鏡,最Wide可達至28mm,以唔使加額外鏡頭來講,已經係DC少有嘅「大角度」,要拍全體照一字排開或有氣勢嘅風景都相當唔錯!富士DC最出名之一都係數佢塊CCD,S9500使用900萬像素SuperCCDHR,係首部達900萬像素級別機種,毋須經過插值技術,就可以輸出3,488×2,616高解像相片,即使專業級玩家都應該相當夠使!SuperCCDHR還有特別之處,就係可提供大範圍ISO值,由高至ISO1600到低至80都有,而使用最高ISO1600時,能大大降低雜訊至可讓用家接受嘅水平,用來拍攝夜景就最一流!而開機速度夠快,只需0.8秒,可讓用家享受到等同單鏡機嘅爽快。

■F掣仍然保留,可快速更改相機設定。

■機背按鍵,都係一貫嘅簡單、易操作。

■S9500機身都唔算大部,女仔一樣啱玩。

AA電芯雙卡插槽

單鏡相機用AA電芯就見得多,不過去到Prosumer級嘅數碼相機,仍然可以AA電芯就推得動都比較少見,S9500只要入4粒AA電芯就夠玩,外出旅遊夠方便,加上用家基本上毋須開住個LCD,只須靠EVF都一樣可以照影,用起來就更為慳電!
富士一向都愛使用xD卡,S9500都唔例外,而且同時亦加入CF卡雙卡槽設計,用家只要喺Menu內就可以選擇採用那張卡拍攝。操作上,S9500多方面都模仿單鏡機操作,用起來亦算爽快,惟當使用全手動拍攝時,光圈同快門仍係使用同一個轉盤設計,反應始終差一點。S9500針對專業級用家使用,用慣「大機」嘅用家應不成問題,不過機內Menu真要一彈,筆者淨係想Format記憶卡,都要花一番功夫先搵到,尤其Menu內再有Menu嘅設計,操作更為不便,而且圖示唔清晰,難以第一時間找到要用嘅項目,希望下一版Firmware能改善呢點。

■快門同光圈仍係用同一個轉盤設定。

■雙卡插槽,可用CF同xD卡。

■只要4粒AA電芯就夠玩。

隔海影景

SuperCCDHR測試

經過一輪試拍,S9500SuperCCDHR效果同以往嘅HR接近,顏色表現相當豐富,不過暗位雜訊表現稍多;驚喜是ISO800超滑淨,媲美D-SLR級,感覺更抵買!

Profile

感光元件:900萬像素SuperCCDHR
變焦:10.7倍光學、2倍數碼
記憶卡:xD、CF
LCD:1.8吋
ISO:80/100/200/400/800/1600
電源:AA電芯×4
體積:128×93×129mm
重量:645g
查詢:富士(24088663)

$5,680