香港貴為美食天堂，呢排竟然咩都唔食得！牛有瘋牛症、豬有豬鏈球菌、雞有H5N1，連魚都話有孔雀石綠，香港人食咩好？「唔通真係食齋咩！」講呢句說話，潛台詞係「冇肉食要食齋真係慘」，如果你重係咁諗就Out喇，𠵱家愈來愈多新派素菜館，想轉食素個心重掛咗啲照燒鰻魚？遇上鰻魚大可以放心食！
記者：盧家蕙
攝影：楊錦文
Model：Josephine（TheGroup）
「素食體驗」的老闆李氏夫婦茹素二十多年，李太喜愛閱讀有關營養和養生的書籍，甚至上堂去進修，為的是研究出更多既健康又富有創意的素菜，無論取材、賣相都糅合了中西日元素，款款用心巧製。李太說開業快將一年，最近開始轉換新餐牌，決定推行無蛋素食，全店用料及醬汁均不含五辛，五辛包括葱、蒜、洋葱、韭菜、蕎頭，不但宗教人士可放心享用，更為食客提供一個真正清新健康的選擇。
歡迎包房搞Party
小記最欣賞的，是此店摒棄一貫古舊沉悶的齋舖形象，裝潢格調清新，全店以橙色為主調，選用的松木色椅桌都較新潮，沒有梵音在耳邊繚繞迴轉，沒有觀音和佛陀的掛畫，相信此舉更受新一代和非宗教人士的喜愛。近三千平方呎的空間中，只放置120個座位，寬敞舒適。此外，特設兩間可容納數圍酒席的貴賓房，李太話，成班年輕人可以來包房開Party，齋舖都搞到派對，真係盞鬼！
鐵板日式鰻魚$52
香港人呢排要忍口禁食鰻魚，真令人洩氣。想食得開心又放心，試吓呢個加了紫菜的黃豆製鰻魚，像真度極高，可以懷緬一下鰻魚的美味。來自加拿大的黃豆，所含蛋白質比雞蛋還多出差不多一倍；日本紫菜中的碘質可防止甲狀腺脹大，更有清熱養血之效，果真健康有益。
海苔琵琶蝦 $52
造型彎彎哋、蒟蒻製的琵琶蝦，唔講真係以為有炸蝦食。「琵琶蝦」沾上新鮮豆腐和海苔絲之後煎香，食落爽口無負擔，少少腥味的海苔令琵琶蝦更似海鮮，一隻隻躺於綠油油的西蘭花海上，加上點綴用的紅椒，更添繽紛色彩。
馬來沙嗲燒雞串 $52
雞串用大豆纖維做成，大豆含豐富維他命B5、B6，可防止慢性病和改善血脂，更有助減低患上與荷爾蒙有關病症的機會，女士們不妨多吃。「燒雞」整得似不在話下，咬落與雞肉的口感竟有八成相似，但又少了那份肥膩感。H5N1？Noway﹗蘸上香濃惹味的特製沙嗲醬，花生味濃郁，不太刺激而且營養十足。
大牌檔叉燒飯 $38
又有新料，大陸用皮革專用的金黃粉扮叉燒汁，食咗命仔危危乎。食呢個最新推出的叉燒飯就包保冇事，低鹽份的豉油，澆上少少芥花籽油，配上豐富維他命C的甜豆，果真色香味俱全。最頂癮係仿照真叉燒燒燶邊的效果，賣相一絕，食落親切。
椒鹽淮山生蠔 $48
一顆顆的小生蠔以蒟蒻製成，炸至金黃後，的骰可愛，咬落真係似食緊生蠔，賣相與質感激似外，連味道都抄到足，令人難以置信！淮山本來無味，經椒鹽和紅椒的調校下吸引多了。淮山粉實，有健脾、補腎又消滯之效。吃一口生蠔的「鮮」，嘗一口淮山的「清」，令人吃得暢快。
清邁泰皇魚 $52
即使曾特首示範既食魚宴都重係無信心？唔使腳震震嘅，呢道甜甜酸酸的泰皇魚就可以令你食指大動，賣相無破綻，食落呃到人。甜酸汁以冬蔭功的材料調校而成，有香茅、南薑和大量鮮茄，香茅排毒消脂，番茄醒胃，清新可口，送飯一流。
波士頓牛仔肉 $52
形神俱似的麵筋牛仔肉，加上惹味的黑椒汁，「肉」質鬆軟而入味，食了一口就停不了，似成咁真係離晒譜！咁以後唔食牛肉都得啦！伴碟的翠綠西蘭花，一淡一濃，精采！
食客有Say
素食體驗
地址：香港灣仔灣仔道140號明豐大廈一樓
電話：21158880
收費：正值周年酬賓大優惠，午市定食$25，特價小菜$28，午市不設加一及免茶芥；晚市茶芥每位$5，須加一。