先一排阿爺話要搞宏觀調控，打擊房地產市場的炒風，令到相關的內地地產股跌到不似人形，但近排情況明顯有所改善，剛公布完業績的中國海外（688）及上海置業（1207）被多間大證券行重新唱好，話買得過咁講。
中國海外剛公布截至今年6月底止中期業績，盈利有5.76億元，比去年同期上升57%。至於上海置業亦唔差，截至今年6月底中期業績，盈利有7780萬元，比去年同期增長36%。
經紀黃話，證券行睇好中國海外，原因係公司賣樓成績超過佢哋預期，此外公司唔投入金礦項目的決定，尤其受到證券行歡迎。下個月，中國海外開始預售澳門的地產項目，有人估計點都套現到十幾億銀。
至於上海置業，有分析員估佢哋下半年陸續有出售物業入帳，而現價又較公司資產淨值有折讓，所以諗得過。
中國海外昨日升2.15％，收1.90元，成交金額4994.3萬元。上置就升7.15％，收1.05元，成交金額3270萬元。
慕容小初