我好儍，收咗份唔知邊個送嘅禮物都可以咁開心。隻杯好靚，我估係Dennis送，不過求證唔到。想話按兵不動，點知下午就有戲劇性發展。我個位遠遠望到Dennis間房，見到佢講電話面紅耳熱拍晒枱，話口未完，就突然流鼻血，流到連文件都有！我即時走入佢房睇佢有冇事，遞上紙巾畀佢止血。死啦，我對佢有Feel？
公司冇秘密，件事好快就傳到Pantry，繙繹小姐話噚晚見到秘書Pinky拎咗碗雞湯畀佢飲，今日就出事。唔怪得啦，睇得多啲飲食節目都知夏天飲雞湯比較燥熱，加埋工作壓力同唔夠瞓，重要係男人，唔流鼻血就奇。其實夏天煲湯應該用豬肉或鴨，因為豬肉潤燥健脾，鴨肉利水清腫，係夏日湯水之選。個Pinky乜都唔識學人亂煲湯，真係呀！
第二日返到律師樓，忙到冇停手。抬頭唞氣時就見Pinky行過，發覺佢換咗新杯。咦，點解隻杯同我收到嗰隻咁似嘅？（三）