期指埋單日，恒指回升85點，昨收14922，同7月底比較，仍有42點進帳。8月份個市，先高後低，炒家坐埋吹水，10個有8個話輸錢，贏得快輸得更快係散戶一般經歷。
國壽C輪9181：國內保險股有勢，中國財險（2328）升兩格，收2.125元。平保（2318）升兩格，收13.50元。國壽（2628）收市前6.10元有幾十萬股買盤，但3點59分過後，有15手每手2千股嘜6.05元，電腦判收6.05元，無升跌。
國壽係最新派半年成績表嘅保險公司，前日晏晝造6.30元，三下五落二去到6元邊邊。國壽半年賺52億元人民幣，大增8成半，又已經相等於去年全年71.7億元嘅7成3。
咁嘅成績表，市場唔應該唔收貨。啱啱有聯交所紀錄，摩通喺上周增持國壽1265萬股，每股6.17元，而對上一周，瑞士信貸亦增持，成本價更高。國壽要上番前周6.45元高位，相信難度唔大，要搵C輪買。
國壽C輪昨日有升有跌。9181由53仙跌落49.5仙，數據唔錯，而且街貨得1.9%，但成交又有29球，最諗得過。隻輪明年1月尾夠鐘，溢價7.4%，槓桿率12.2倍（有效7.1倍），引伸波幅27.8%。交投較少嘅9226，數據冇咁靚，昨升7%，更顯得9181抵買。
章盛