噚日煲呔忽然話有大新聞要宣布，大家諗，莫非梁愛詩遞咗辭職信？最後唔係開呢科。不過，都係遲早事咯，梁愛詩接班人之所以搞到咁頭大，皆因當年廖長城以為做梗，唔肯喺老董年代即時上位，所謂人算不如天算，詩姐姐嘅指定接班人過唔到新的特首煲呔同肥龍許仕仁呢關，於是睇住個囊中物走甩，真係失之交臂。
詩姐姐選嘅你唔要，就要考新的領導嘅政治智慧，如果搵個民主派人士，就要過到北京嗰關。有人話陳志海（圖）同余若海「兩個海」都冇得頂，但係識陳大狀嘅人都知佢為人好低調，一定唔會答應。八方梗係希望煲呔說服到佢，因為當年佢捐咗五百萬畀中大開法律學院，之前又捐三百萬畀母校港大，聽佢講人生哲理同佢嘅艱苦奮鬥，八方十分感動，一個有血有肉嘅人做律政司司長，當然係港人之福。
爆料熱線：29290000、27860099
報料傳真：26239278
報料電郵：[email protected]