大型新盤一個接一個登場，繼長實將軍澳都會駅之後，禮拜五又輪到九倉深井碧堤半島三期搞名人之夜，發展商九倉置業發展董事黃光耀，近日馬不停蹄，出席多個誓師大會、專舖開幕等活動，見報率多過明星。噚日港置誓師，黃生同一位以美人魚造型嘅模特兒亮相，推介一座樓王海凌霄。
吹風會搞咗咁多次，今日終於都輪到開示範單位，一共六個，真係要拭目以待，同時會正式委託各大代理，重請埋地產代理監管局嚟監場。
黃生話，之前喺展覽廳登記咗嘅準買家，可以喺名人之夜優先參觀示範單位，而特色單位亦可接受登記。
碧堤半島三期分別係第一及第三座，佢就話未諗掂先推邊座，不過第一座坐向好啲，會先求價，而第三座就會求量，兩座價錢會有兩成差距。
電郵地址：[email protected]