搵高官Ａ參加午餐演講會，佢話呢排好忙，成日掛住迪士尼樂園開幕，唔得閒住。
𠵱家做高官，要日日睇住市面發生任何事情，是否會與自己扯上關係，及早未雨綢繆。官場ＡＯ話畀左丁山知，曾特首上任，最唔鍾意聽到嘅就係：「唔關我事，唔關我部門事。」邊個敢向特首講呢句說話，聽鬧都似。
譬如最近連綿大雨，斜坡不穩，若有幾日陽光普照，曬鬆啲泥，再落幾日大雨，分分鐘有唔少滑坡事件，路政署、運輸署、警察、屋宇署都會好唔得閒，所以啲署長、秘書長、局長有乜辦法唔日日講天氣，隨時準備。
迪士尼樂園開幕，冇小巴專線，於是小巴司機又話要抗議，在九月十二日發動小巴聚集於迪士尼樂園外，阻塞交通。呢類威脅通常冇乜作用，政府睬你都儍。不過嗰日又話國家領導人曾慶紅來港，佢嘅宗親點肯失威呀，警方與運輸署非搞掂不可，至於如何擺平，廖局長負最大責任。
高官們雖然日日緊張，驚住曾特首親自發電郵指示，但另一方面都有番啲士氣，皆因曾特首立場企硬（如外判），信息清晰，唔會瞻前顧後，睇左睇右，睇三個月都未下指示，於是高官易做好多，喺前線都夠膽挺起胸膛，成個戰鬥格。唔信嘅話，睇吓啲救生員、魚販、小巴老闆如何與高官交涉，就略知一二。
曾特首兩年之內，有兩件原則性大事，就係政改與維護法治；一件技術性小事，就係與立法會民主派、福利派議員周旋，唔好搞最低工資、最高工時呢類錯誤經濟政策。如果佢能夠成功，二○○七年競選，重邊有對手吖，個個潛在對手都一定會退避三舍。