現年二十六歲嘅新一代體育新聞王子伍家謙，早排曾經俾周刊影到當街煲煙、同圈外女友攬腰睇波鞋，大前晚佢同女友夜遊銅鑼灣，照樣邊等巴士邊煲煙，同電視螢幕上文質彬彬嘅形象截然不同。
大前晚十一點，昂藏六呎嘅伍家謙又係着住件籃球之神佐敦嘅球衣（JORDAN23籃球背心），同身形嬌小玲瓏嘅女友手拖手出現銅鑼灣渣甸坊。當時佢哋行緊去皇室堡附近嘅超級市場，由於收銀排隊人龍好長，伍家謙就即刻拖女友去便利店買嘢飲。
煲煙怕人望
買完飲品，伍家謙同女友行去巴士站等車，其間佢煙癮大發，點煙狂煲，喺呢個時候佢至發現有好多人對佢投以注目禮，不自覺就甩開女友隻手，將煙仔收埋喺背後，冇耐重有位女士上前問路，平日口齒伶俐嘅伍家謙居然粒聲唔出，反而女友就好熱心咁指示對方點行㖭。大概等咗十分鐘，伍家謙同女友上咗往寶琳嘅690巴士，佢哋排隊上車時頭耷耷東張西望，好似好謹慎。