期指結算日港股表現好波動，恒指曾跌過4點，但午後又升過140點，收市14922，升85點，成交169億元，投資者多持觀望。9月期指一度衝上14987，但回番14901收，低水收窄到21點。
大市調整是否已完成（即係本周一的14734係低位），仍待觀察，但即使再跌，幅度亦不會大，而且唔排除會以橫行的形式，恒指在14800至15200間上落，去完成今次調整。恒指今次由15509落到14734，跌咗775點，以一個小調整來說，幅度勉強可說足夠，但時間未夠（只得11個交易日），因此，未來兩三個禮拜，有可能橫行打底，整固完成後，再起升浪。
噚日上升股（唔計認股證）有360多隻，有兩類股份好突出，就係濠賭股同內地地產股，後者炒REITs概念，好似華潤置地（1109）就搶上1.94元收，升幅5.4%，而越秀投資（123）亦高收0.76元，升5.5%。
黃金集團傳有動作
濠賭股最靚係嘉華系，嘉華國際（173）收2.75元，升0.2元，升幅7.8%，嘉華建材（027）收5.70元，升0.35元，升幅6.5%。另外，近期慢火煎魚式回升的奧瑪仕（959）就高收0.55元，再升3仙，升幅5.7%；而東方明珠（600）收0.425元，升3.5仙，升幅8.9%。
濠賭股呢輪開始又有番動作，亦見到大戶在做工夫。噚日收到料，話嘉華系會再發力，今次主力會在嘉國身上。市場近日傳嘉國送嘉建，可靠性聽講係九成九，現水平上車，可能會有意想不到嘅收穫。
另外一隻可以食大茶飯嘅就係黃金集團（1031），呢輪股價在2.50元水平反覆，似有一隻無形的手㩒住，唔排除大股東在注資之前唔想股價大升嘅可能性，但以家吓賭股已紛紛有表現之際，而傳黃金集團注資的項目又係極引人注目嘅賭廳，相信幕後一有動作，股價就會飛升。
黃金集團大股東私人持有的6個黃金廳，聽講好快就會有注資行動，現時「黃金廿一」已取得中介人牌照，餘下5個黃金廳，預料在一兩個月內亦可取得牌照。聽可靠消息，6個黃金廳1年嘅盈利逾10億元，注資一落實，有數得計，黃金集團股價翻一番亦有可能。
郭兆誠