滙豐銀行大班鄭海泉呢兩日上咗京，噚日去中南海拜會副總理黃菊。鄭大班同埋北京班同事一齊，北京方面就有人行行長周小川、銀監主席劉明康，重有剛剛南下過嘅陳佐洱，都好熱鬧。聽聞黃菊做上海市長時，同滙豐喺上海嘅人都幾熟。
呢個本來係禮節性會面，但出到副總理，按國務院規格就要由新華社出新聞稿。新華社引述黃菊話「滙豐銀行作為香港一家主要的英資財團，長期以來對香港的經濟發展和社會穩定，以及內地的經濟建設作出了積極貢獻。」又讚滙豐近年推動內地經濟發展同加強中港經貿交流發揮重要作用。
副總理咁講，滙豐當然好高興。係人都知，香港回歸之後，呢間英資銀行已被排拒於政治權力核心之外，行會寧願搵啲地區經理入會，都唔再預滙豐大班一席，以顯示政治正確。𠵱家有個領導人肯定吓，就算係應酬，條氣都順番啲。
爆料熱線：29290000、27860099
報料傳真：26239278
報料電郵：[email protected]