財演Ｋ得閒就去中山打波、小住，皆因佢在當地買咗一間靚屋，地方大唔在講，設計裝修猶勝香港豪宅。發展商係香港大藍籌公司，因中山地價便宜，有心機搞靚啲屋，喺香港就唔同，地價貴，樓係要嚟炒，唔係要嚟住嘅，使乜起得咁靚？
屋就靚嘞，鄰居質素如何，會唔會搞鬼？財演Ｋ話：「質素最差嗰個可能係我，唔使港紙一百萬元嘅屋，鄰居個個用現錢買，只有我呢個港燦要按揭！我去車行睇車，只係貪過癮，一個平時見到嘅魚販入到去，睇啱架車，就放低一袋銀紙，揸走架車。」
內地人愛現金，不寫支票，存錢入銀行，貪俾人知，或會俾人查咩。財演Ｋ有一位內地客戶嚟到香港開戶口炒股票，擺低幾十萬現金，財演Ｋ叫佢去銀行開戶口先，但銀行只肯收最多三十萬，於是呢位客戶去咗三間銀行開戶口，然後寫來三張支票存入財演Ｋ間公司嘅股票戶口，需一番時間。
財演Ｓ亦有同樣客戶，但佢比較心急，與客戶一起到銀行，就將一百萬現款存落公司嘅股票戶口，快就快嘞，就惹上更大麻煩，因為銀行將大額現款交易上報金管局，跟住證監會就派人到公司查核內部操作守則、反洗黑錢嘅機制，查咗一輪先至ＯＫ無事。既有如此後果，內地大款拎現金來港，都係叫佢自己去咗銀行開戶口較為化算。
現金之前，港燦自然矮咗一截，更何況內地嘅大企業有資格收購美國大企業，氣魄勝我哋何止一籌。世姪Ｃ自劍橋讀完書，入咗投資銀行，經常到上海北京call客，因自小在英國讀書，英文雖然叻叻聲，國企大班就一味同佢講普通話、寫中文、用內地術語，就係翹尾巴，寸世姪Ｃ唔多識中文。冇計啦，好英文可以給你一份好工，但要同時好中文先至可以建立長久內地關係。